Urukiko Rukuru rwa Gisirikare rwanze ubujurire bw’abasirikare bavugwa muri dosiye ya APR FC

Isomwa ry’Urubanza ryabaye kuri uyu wa Gatatu tariki ya 10 Nzeri 2025, ryabaye yaba abaregwa  ndetse n’ubushinjacyaha  batari mu Rukiko.

Ku wa 26 Kanama 2025 nibwo  Urukiko rwa Gisirikare ruri i Nyamirambo, rwari rwategetse ko abaregwa bafungwa by’agateganyo iminsi 30.

Ni icyemezo bahise bajuririra mu Rukiko Rukuru rwa Gisirikare.

Ubushinjacyaha bwasabiraga aba baregwa gufungwa by’agateganyo kuko hari impamvu zikomeye zituma bakurikiranwa.

Urukiko rwa Gisirikare rwemeje ko hari impamvu zikomeye zituma Maj Muligande Vincent akekwaho ubufatanyacyaha mu cyaha cyo gukoresha umutungo wa leta icyo utagenewe.

Icyakora urukiko ruvuga ko nta mpamvu zikomeye zatuma akekwaho icyaha cyo guha undi muntu inyandiko adakwiye kuyihabwa.

Kuri Capt Mutoni Peninah, urukiko rwemeje ko hari impamvu zikomeye zituma akekwaho icyaha cyo gukoresha umutungo wa leta icyo utagenewe n’icyaha cyo gukora no gukoresha inyandiko mpimbano. Icyakora rwasanze nta mpamvu zikomeye zatuma akekwaho icyaha cyo guha undi muntu inyandiko adakwiye kuyihabwa.

Ni mu gihe Capt Murungi Peninah, urukiko rwemeje ko hari impamvu zikomeye zituma akekwaho ubufatanyacyaha mu cyaha cyo gukoresha umutungo wa leta icyo utagenewe.

Mu isomwa ry’urubanza ryabaye none tariki ya 10 Nzeri 2025, Urukiko rwanze ubujurire bwabo, rutegeka ko bakomeza gufungwa iminsi 30 kuko hari impamvu zikomeye zituma bakurikiranywa.

Biteganyijwe ko nyuma y’iminsi 30, abaregwa bazatangira kuburana mu mizi.