Nyagatare:Abagize ihuriro ry'Ubumwe n'Ubudaheranwa bw'Abanyarwanda bagaragaje icyatuma bugerwaho 100%

Mu gihe igipimo cy’ubumwe n’ubwiyunge kigaragaza ko 99% by’abanyarwanda bashyize imbere ubunyarwanda, abagize ihuriro ry’ubumwe n’ubudaheranwa mu Karere ka Nyagatare bagaragaje ko gutoza abakiri bato kwimakaza indangagaciro z’umuco nyarwanda, gukoresha neza imbuga nkoranyambaga,bigamije kurandura ingengabitekerezo ya Jenoside; ari zimwe mu ngamba zizafasha mu kugera ku gipimo cya 100%.

Oct 30, 2025 - 10:51

Ibi babigarutseho kuri uyu wa Gatatu Tariki ya 29 Ukwakira 2025 ubwo bari bateraniye mu Ihuriro ry'Ubumwe n'Ubudaheranwa bw'Abanyarwanda aho yari ifite insanganyamatsiko igira iti: "Twimakaze Ubumwe n'Ubudaheranwa".

Bamwe mu bitabiriye iri huriro baganiriye n'ikinyamakuru Iwacupress.com bavuze ko uruhare ari urwabo mu kwegera abakiri bato.

Nambajimana wo mu Murenge wa Gatunda yagize ati: "Mu by'ukuri izi nyigisho dufashe nonaha navuga ko ari nko kwinegura, hashize umwaka tuvuye aha hari ibyo twari twiyemeje kugeraho kandi twabigezeho kandi murabizi ko kwigisha ari uguhozaho. Urubyiruko ni ukurusobanurira amateka mbona igihe ari iki ngo tubegere maze tubasobanurire byimbitse ibyabaye noneho n'icyakozwe kugira ngo u Rwanda rube rugeze aho ruri uyu munsi".

Ntagangwa Steven wabaye Konseye (Conseille) wa Segiteri Kabare nawe yagize ati: "Rwose muri aka karere kacu (Nyagatare) nk'uko babivuze Ubumwe n'Ubudaheranwa bimeze neza cyane, ukurikije mbere hose aka karere gafite amateka maremare, guhuza abantu bari baturutse imihanda yose zaba za Nakivara mu Bugande ndetse n'ahandi hirya no hino imbere mu gihugu ntabwo byari byoroshye ariko kubera ubuyobozi bwiza bugenda bubikemura bwigishije abaturage ubumwe n'Ubwiyunge.

“Mu myanzuro dufatiye muri iri huriro navuga ko igisigaye ari ukwigisha urubyiruko cyane cyane abakiri bato kuko abakuru bo barabizi ariko abo bato tugiye kubasanga hasi mu Midugudu ariho tubigishiriza Ubumwe n'Ubwiyunge kugira ngo bazabikurane,ikindi kandi no mu mashuri naho barabyigisha yaba abanza n'ayisumbuye bityo rero nidufatanya twese ikigero cy' ubumwe n'ubudaheranwa twifuza kizagerwaho".

Katurebe Moses, Umuhuzabikorwa w'Inama y'Igihugu y' urubyiruko mu karere ka Nyagatare yavuze ko nk'urubyiruko biteguye gukomeza gahunda y’ubumwe n'ubudaheranwa kugira ngo hatazagira uwabashora mu bikorwa by' ingengabitekerezo ya Jenoside.

Ati:"Nk'urubyiruko rwa Nyagatare turiteguye kuko ari inshingano zacu, turashima gahunda ubuyobozi bwashyizeho yo kuzana urubyiruko mu buyobozi, twebwe imyumvire ihagaze neza ku bintu bijyanye n'ubumwe n'ubwiyunge. Igikomeye kirimo nuko no mu bigo by'amashuri yaba abanza n'ayisumbuye bigishamo ubumwe n'ubudaheranwa ubwo rero ahasigaye ni ahacu mu kubisigasira na cyane ko ari twe dukoresha imbuga nkoranyambaga dukwiye kuzikoresha neza uko bikwiye".

Umuyobozi w'Akarere ka Nyagatare Gasana Stephen yavuze ko intambwe bateye ari nziza ukurikije n'ibiganiro byatanzwe.

Yagize ati:"Ukurikije ibiganiro byatanzwe aha,biragaragara ko hari intambwe nziza twateye, abagize ihuriro ry'Ubumwe n'Ubudaheranwa bagiye babaha ingero zaho batuye,bafite ingero nziza bakwereka aho bari mu matsinda,ibyo baganiriramo usanga abantu bose bashyize ibyateza imbere aho batuye mu bikorwa by'ubuzima bya buri munsi.

“Hari ukwiyemeza aho ugomba gukora ibikureba waba uri umurezi ku kigo cy'amashuri runaka ugakora ibishoboka, ubwo rero ari ukwiyemeza mu bikorwa abantu bakora bigaragaza ko ibyagezweho ari byiza kandi inzira ari nziza".

Umunyamabanga nshingwabikorwa wa Komisiyo y'igihugu y'amatora wari umushyitsi mukuru wari uhagarariye umuryango Unity Club Intwararumuri Jean Claude Musabyimana yavuze ko iri huriro ribafasha kongera kwibutsa abayobozi ndetse n'abahoze ari abayobozi ko nta muyobozi uva mu nshingano.

Yagize ati: "Ubutumwa bwa Unity Club ni ukongera kwibutsa abayobozi n'abahoze ari abayobozi ko nta muyobozi uva mu nshingano, ni ukuvuga ngo iyo ubaye umuyobozi izo nshingano z'ubuyobozi ukomeza kubana nazo ntabwo zikuvaho, ntabwo ibyo wakoraga byiza ukiri umuyobozi ntabwo wabivaho ngo nuko utakiri muri uwo mwanya ahubwo birakomeza ari nayo mpamvu bashyizeho iri huriro riduhuza kugira ngo cyane cyane tuganire uburyo twakomeza gusigasira ubumwe bw'Abanyarwanda no gukomeza kubaka ubudahangarwa bw'abanyarwanda kugira ngo igihugu cyacu ndetse n'abanyarwanda batazigera bagamburuzwa n'ibihe".

Muri iri huriro hafatiwemo imyanzuro icyenda harimo n'uwo kwegera abakiri bato bagasobanurirwa amateka yaranze u Rwanda nka kimwe mu byatuma Ubumwe n'Ubudaheranwa bw'Abanyarwanda bigera ku gipimo cya 100% cyifuzwa.

Abitabiriye iri huriro barimo abahoze ari abayobozi, abayobozi bari kuyobora, abanyamadini ndetse n'abandi basobanuriwe ko Ihuriro ry’Ubumwe n’Ubudaharanwa, ari urubuga rwo gusangira ibitekerezo no gushimangira ko Ubumwe n’Ubudaharanwa ari ishingiro ry’iterambere rirambye ry’u Rwanda.

Ni ku nsanganyamatsiko igira iti: “Twimakaze Ubumwe n’Ubudaharanwa.”